ក្រុងប៉ោយប៉ែតឆ្នាំ២០២០ មានសញ្ញាណល្អឡើងវិញ ក្រោយចិនចាកចេញ តម្លៃដីធ្លីឡើងខ្ពស់ជាងមុន

ភ្នំពេញ​ ៖ វត្តមានហូរចូលជនជាតិចិនតាំងពីចុងឆ្នាំ២០១៧ បានធ្វើឲ្យសេដ្ឋកិច្ចរបស់ក្រុងប៉ោយប៉ែត បានរីកចម្រើនជាលំដាប់ ហើយហក់ឡើងយ៉ាងខ្លាំងគួរឲ្យកត់សម្គាល់នាដើមឆ្នាំ២០១៩ ដែលធ្វើឲ្យវិស័យដីធ្លី និងសំណង់រីកដូចផ្សិតហើយលក់ និងជួលបានថ្លៃគួរសមផងដែរ។ គ្រប់យ៉ាងត្រូវបានប្រែប្រួល ក្រោយបិទល្បែងអនឡាញរបស់ប្រមុខរាជរដ្ឋាភិបាលកាលពីចុងខែសីហាឆ្នាំ ២០១៩ ដែលធ្វើឱ្យប៉ះពាល់ដល់វិស័យអចលនទ្រព្យ ក៏ដូចជាអាជីវករមួយចំនួនដែលរកស៊ីជាមួយជនជាតិចិ។

តែបើទោះបីជាយើងណា នាដើមឆ្នាំ២០២០នេះ ក្រុងប៉ោយប៉ែតហាក់មានសញ្ញាណបណ្ដើរៗ ដោយយើងឃើញថា មានវិនិយោគិនបរទេស ក៏ដូចជាការសាងសង់នានាហាក់មានសន្ទុះឡើងវិញ។

ជាក់ស្ដែង តាមការលើកឡើងពីលោកជា បូណាន បានប្រាប់Business Cambodiaថា ប៉ោយប៉ែតនៅតែមានសេដ្ឋកិច្ចល្អ បើមិនរាប់បញ្ចូល សំណង់ និងអាជីវកម្មកើតឡើងថ្មីដែលទាក់ទងដោយផ្ទាល់ជាមួយជនជាតិចិន

ដោយសារអំណោយផលទីតាំងភូមិសាស្ត្រច្រកអនត្តរជាតិធំជាងគេរបស់ប្រភេទកម្ពុជាដែលមានទំហំសេដ្ឋកិច្ចរាប់ម៉ឺនលានដុល្លាក្នុងមួយឆ្នាំៗ មជ្ឃមណ្ឌលកំសាន្តកាស៊ីណូធំៗជាងដប់កន្លែងដែលស្រូបទាញទេសរណ៍ជនជាតិថៃមកកំសាន្តផ្សងសំណាងមិនដាច់និងផ្តល់ការងារដល់រាប់ពាន់កន្លែង។

លោកជា​ បូណានក៏បានប្រាប់ថា “នៅក្នុងឆ្នាំ២០២០នេះ សំណង់ដែលបានជាប់គាំងខ្លះ ត្រូវបានសាងសង់បន្ដ ដោយឡែកសំណង់ថ្មីៗមិនទាន់ពុះកញ្ជ្រោលខ្លាំងដូចឆ្នាំចាស់នោះទេ រីឯស្ថានភាពវិនិយោគអចលនទ្រព្យហាក់ផុសផុលខ្លាំង ដោយសារមានវិនិយោគិនថ្មីៗចូលកវិនិយោគ ហើយតម្លៃដីធ្លីឡើងថ្លៃជាងឆ្នាំមុនទៅទៀត” ។

លោកក៏បានប្រាប់បន្ដថា ប៉ោយប៉ែតនៅមានគម្រោងរដ្ឋចំនួនពីរទៀតដែលមិនទាន់ដំណើរការនៅឡើយគឺច្រកស្ទឹងបទ និងអូនាងនៅតែជាក្តីសង្ឃឹមរបស់អ្នកវិនិយោគក្នុងតំបន់នេះដែលជួយបន្ថែមគុណតម្លៃលើវិស័យអចលនទ្រព្យលើកលែងអចលនទ្រព្យលាបក្រែមថែមម្សៅ តែទោះបីយ៉ាងណាជនរងគ្រោះអាចជាអ្នកទិញជាជាងអ្នកលក់ ដូច្នេះអ្នកទិញគួរពិចារណា ភូមិសាស្ត្រដែលសមស្របជាមួយលទ្ធភាព និងតម្រូវការប្រើប្រាស់របស់ខ្លួន។

អត្ថបទដោយ៖ នឹម ផានុន