អបអរ!! OCICត្រៀមចុះកិច្ចព្រមព្រៀងជាមួយក្រុមហ៊ុនSCA លើគម្រោងសាងសង់ព្រលានអន្តរជាតិភ្នំពេញថ្មី

  ភ្នំពេញ ៖ អាកាសចរណ៍ស៊ីវិលបានស្នើឱ្យក្រុមហ៊ុន SCA រៀបចំសេចក្ដីព្រាង ក្នុងការចុះកិច្ចព្រមព្រៀងជាមួយក្រុមហ៊ុន OCIC លើគម្រោងសាងសង់អាកាសយានដ្ឋានអន្ដរជាតិភ្នំពេញថ្មី ឱ្យបានមុនថ្ងៃទី១៣ ខែកុម្ភៈ ឆ្នាំ២០២០ខាងមុខនេះ ខណៈក្រុមហ៊ុន OCIC ទន្ទឹងចាំមើល លក្ខខណ្ឌកិច្ចសហប្រតិបត្ដិការរបស់ក្រុមហ៊ុន SCA អាចទទួលយកបានដែរឫយ៉ាងណា។

  យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា កាលពីថ្ងៃទី ខែកុម្ភៈ ឆ្នាំ២០២០ ក្នុងកិច្ចប្រជុំសម្របសម្រួលពិភាក្សា​លើ​គម្រោង​អភិវឌ្ឍន៍អាកាសយានដ្ឋានអន្ដរជាតិភ្នំពេញថ្មី នេះ​ ឯកឧត្តម​​​ ម៉ៅ ហាវណ្ណាល់ រដ្ឋមន្រ្តី ទទួលបន្ទុក រដ្ឋលេខាធិការ​ដ្ឋានអាកាសចរណ៍ស៊ីវិលបានស្នើឱ្យក្រុមហ៊ុន SCA រៀបចំសេចក្ដីព្រាង កិច្ចព្រមព្រៀង ឬ អនុស្សរណៈយោគយល់គ្នាពិសេសមួយ ស្ដីពីកិច្ចសហប្រតិបត្ដិការ រវាង OCIC និង SCA ស្ដីពីគម្រោងអភិវឌ្ឍន៍សាងសង់អាកាសយានដ្ឋានអន្ដរជាតិភ្នំពេញថ្មី ដើម្បីពិនិត្យឱ្យបានត្រឹម​ត្រូវមុន​នឹងក្រុមហ៊ុនធ្វើការសាងសង់។ ​ក្នុងកិច្ចជំនួប រវាងក្រុមហ៊ុន Vinci Airports តំណាងដោយលោក Emmanuel MENANTEAU ក្រុមហ៊ុនសម្បទាន អាកាស​យាន​ដ្ឋាន SCA តំណាងដោយលោក Alain BRUN និងក្រុមហ៊ុន OCIC តំណាងដោយ ឯកឧត្ដម វ៉ាន់ ឆាលហ៍ នេះ ឯកឧត្ដមបណ្ឌិត ម៉ៅ ហាវណ្ណាល់ បានណែនាំដល់ ក្រុមហ៊ុនត្រូវរៀបចំកិច្ចព្រមព្រៀង​ស្ដីពី​គម្រោងអភិវឌ្ឍន៍សាងសង់អាកាសយានដ្ឋានអន្ដរជាតិភ្នំពេញថ្មីផ្ញើមករដ្ឋលេខាធិ​ការដ្ឋាន ​អាកាសចរណ៍ស៊ីវិល ឱ្យបានមុនថ្ងៃទី១៣ ខែកុម្ភៈ ឆ្នាំ២០២០ខាងមុខនេះ។

  លោកបានបន្ថែមថា ក្នុងករណីចាំបាច់ ពាក់​ព័ន្ធនឹងការបច្ចេកទេសភាគីទាំងពីរត្រូវផ្ដល់ជំនាញការពិភាក្សាជា លក្ខណៈទ្វេភាគី​ក្រោម​ការសម្របសម្រួលពីរដ្ឋលេខាធិការដ្ឋានអាកាសចរណ៍ស៊ីវិល។

  ជាការឆ្លើយតបភាគីក្រុមហ៊ុនទាំងពីរបានបញ្ជាក់ឱ្យដឹងថា ក្រុមហ៊ុន Vinci Airports និង​ក្រុមហ៊ុន SCA មានសេចក្ដីរីករាយក្នុងកិច្ចសហការឈរលើមិត្ដភាព ជាមួយនឹងក្រុមហ៊ុន OCIC ក្នុងគម្រោងរៀបចំប្លង់រចនាបទ ការផ្ដល់ប្រភពហិរញ្ញប្បទាន ការសាងសង់រចនា​សម្ព័ន្ធសំណង់ និងធ្វើអាជីវកម្ម ជាពិសេសបើអាច យើងពិភាក្សាគ្នាអំពីការបង្កើតក្រុមហ៊ុន​រួមគ្នា រវាង OCIC និងSCA ដូចដែលក្រុមហ៊ុន SCA ធ្លាប់មានបទពិសោធន៍ជាមួយ ក្រុមហ៊ុន Mohiba ក្នុងការអភិវឌ្ឍសាងសង់អាកាសយានដ្ឋានអន្ដរជាតិភ្នំពេញបច្ចុប្បន្ន។

  ដោយឡែក​ក្រុមហ៊ុន OCIC បានបញ្ជាក់ថា ខ្លួនក៏មានការរីករាយក្នុងការសហការជាមួយក្រុមហ៊ុន SCA ដែរ។ ប៉ុន្ដែបានស្នើសុំឱ្យភាគីក្រុមហ៊ុន SCA ជួយរៀបចំកិច្ចព្រមព្រៀង ឬអនុស្សរណៈ យោគ​យល់គ្នាពិសេសមួយក្នុងលក្ខខណ្ឌកិច្ចសហប្រតិបត្ដិការដែលអាចទទួលយកបានក្នុងគម្រោង ​អភិវឌ្ឍន៍សាងសង់អាកាសយានដ្ឋានអន្ដរជាតិភ្នំពេញថ្មីនេះ។

  គួរជម្រាបផងដែរថា គម្រោងព្រលានយន្តហោះភ្នំពេញថ្មីនេះ មានតម្លៃប្រមាណជា ១.៥ ពាន់លានដុល្លារអាមេរិក ដែលនឹងសាងសង់នៅលើផ្ទៃដីទំហំ ២.៦០០ហិកតា ក្នុងនោះ ផ្ទៃដី ៧០០ហិកតាគឺសម្រាប់ព្រលានយន្តហោះ ហើយទីតាំងដែលនៅសល់នឹងត្រូវ អភិវឌ្ឍន៍ទៅជាទីក្រុងព្រលានយន្តហោះ ដែលមានការអភិវឌ្ឍន៍ចម្រុះរួមបញ្ចូលទាំងមជ្ឈមណ្ឌលពាណិជ្ជកម្ម និងលំនៅឋានផងដែរ។

គួររំលឹកដែរថា កន្លងមក អ្នកឧកញ៉ាពុង ឃាវ​សែ អគ្គនាយកក្រុមហ៊ុន OCICក៏បានបញ្ជាក់ ដែរថា «តំបន់សេដ្ឋកិច្ចពិសេសក្បែរព្រលានយន្តហោះថ្មី នេះអាចនឹង ធំជាង​កោះ​ពេជ្រប្រហែល១០ដង ព្រោះតំបន់នោះមានផ្ទៃដីជាង១ពាន់ហិកតា ដូច្នេះថ្ងៃក្រោយដីមួយចំនួន​យើងអាចសាងសង់ផ្ទះដែល មានតម្លៃសមរម្យ សម្រាប់ បងប្អូន ដែលមានចំណូលមិនសូវខ្ពស់ ដើម្បី​ទាក់​ទាញប្រជាជនឲ្យមករស់នៅកុះករ ព្រោះតំបន់ព្រលានត្រូវការភាពអ៊ូអរ មានកម្មកររស់​នៅ​ច្រើន ពិសេសកាត់បន្ថយ ចំណាយលើការដឹកជញ្ជូនជាដើម»។

អត្ថបទ៖ ភោគ ម៉ារី