ដំណឹងល្អ! មិនយូរទេ ខេត្តក្រចេះ នឹងមានស្ពានឆ្លងកាត់ទន្លេមេគង្គ ប្រវែងសរុបជិត២ពាន់ម៉ែត្រ

ភ្នំពេញ ៖ ខេត្តក្រចេះ គឺជាខេត្តមួយដែលមាន​​រមណីយដ្ឋានធម្មជាតិជាច្រើនដូចជា រមណីយ​ដ្ឋាន​អន្លង់​ផ្សោត ​រមណីយ​ដ្ឋាន​​កាំពី​ និង​វត្ត​សសរ​១០០​​ វត្តភ្នំសំបុក ភ្នំសុពណ៌កាឡី សួនស្នេហ៍ថ្មបាំង -ល- ក្រៅពីនេះ នៅមានទេសភាព ដ៏ស្រស់សោភ័ណ ថៃ្ងលិចគងព្រៃនៅកោះទ្រង់ដ៏ស្អាត ដែលទាំងអស់នេះអាចទាក់ទាញភ្ញៀវទេសចរណ៍ជាតិ និងអន្តរជាតិ នាំគ្នាទៅលេងកំសាន្តបាន ហើយក៏ធ្វើឱ្យប្រជាពលរដ្ឋអាចរកចំណូលបានទៀតផង​។

កាលពីពេលថ្មីៗកន្លងទៅនេះ លោករដ្ឋមន្រ្តីក្រសួងសាធារណការ និងដឹកជញ្ជូន បានអះអាងថា កម្ពុជានឹងស្នើប្រាក់កម្ចីសម្បទានពីរដ្ឋាភិបាលចិន នៅពេលខាងមុខនេះ ដើម្បីសាងសង់ស្ពានឆ្លងទន្លេមេគង្គមួយទៀត នៅខេត្តក្រចេះ ដែលមានប្រវែងសរុប១៧៦១ម៉ែត្រ។

លោកបានបញ្ជាក់ថា៖ លោកនឹងរៀបចំគម្រោងសំណើនៅឆ្នាំ២០២០ ហើយការសាងសង់នេះអាចនឹងធ្វើឡើងនៅឆ្នាំ២០២១ បន្ទាប់ពី​លោក​បាន​ដឹកនាំក្រុមការងារចុះពិនិត្យរកមើលទីតាំងសាងសង់ស្ពានឆ្លងទន្លេមេគង្គ នៅខេត្តក្រចេះ កាលពីពេលថ្មីៗកន្លងទៅនេះ។ លោកបាន​បន្ថែម​ទៀតថា៖ ការសាងសង់ស្ពានឆ្លងកាត់ទន្លេរមេគង្គនៅខេត្តក្រចេះទៅកាន់​ខេត្តកំពង់ធំនេះ គឺត្រូវបានអនុវត្តតាម​អនុសាសន៍​ដ៏ខ្ពស់ខ្ពង់​របស់ សម្តេចតេជោ ហ៊ុន សែន ហើយក៏កំពុង​តែសិក្សាដើម្បីសាងសង់ឱ្យបានឆាប់រហ័ស ដើម្បីផ្តល់ភាពងាយស្រួលដល់ប្រជាពលរដ្ឋ ក្នុងការធ្វើដំណើរពីខេត្តស្ទឹងត្រែង ទៅកាន់ខេត្តកំពង់ធំ ដែលចំណេញពេលវេលា និងថវិកាច្រើនជាងមុន។

ស្ពាននេះអាចនឹងធ្វើពីចន្លោះទ្រុងហើយនិងកោះឆាង នេះបើតាមការមើលនៅក្នុងផែនទី ប៉ុន្តែជាក់ស្តែងបែបណានោះ​យើងមិនទាន់ដឹង​នៅ​ឡើយទេ ដោយសារគម្រោងនេះកំពុងតែស្ថិតក្នុងការសិក្សាបន្ត។ នេះបើតាមរយៈលោកទេសរដ្ឋមន្រ្តី ស៊ុន ចាន់ថុល ។

លោកក៏បានស្នើសុំដល់មហាជនទាំងឡាយ កុំឱ្យអ្នករិះគន់មកលើរាជរដ្ឋាភិបាលកម្ពុជាអី ហើយលោកក៏បានអះអាងថា៖ កម្ចីនេះ គឺដើម្បីចំណេញជាតិ ចំណេញប្រជាពលរដ្ឋ ហើយខ្ចីមកសាងសង់ហេដ្ឋារចនាសម្ព័ន្ធនៅក្នុងប្រទេសនោះទេ។

គួរជម្រាបផងដែរថា ស្ពានដែលគ្រោងនឹងសាងសង់នេះគឺមានប្រវែង១៧៦១មែត្រ ដែលស្ថិតនៅក្នុងខេត្តក្រចេះ​ជាស្ពាន​ឆ្លង​កាត់​ទន្លេរ​មេគង្គ ហើយអ្វីដែលពិសេសនោះ គឺជាឱកាសមួយក្នុងការ​ជំរុញល្បឿននៃការរីកចម្រើនរបស់ខេត្តក្រចេះ​ទាំងមូលដោយ​ជួយ​បង្កើន​ភាពទាក់ទាញនូវគម្រោងធំៗទៅបោះទុនវិនិយោគនៅទីនោះផងដែរ៕

អត្ថបទ៖ ដារ៉ូ