គម្រោង ៥ធំៗនៅកោះកុង កំពុងក្លាយជាមន្តស្នេហ៍ ទាញអ្នករកស៊ីដីធ្លីឲ្យទៅវិនិយោគ

  ខេត្តកោះកុងជាខេត្តមួយដែរមានព្រំប្រទល់​ជាប់នឹងខេត្តព្រះសីហនុជាពិសេសមានព្រំប្រទល់ជាប់ប្រទេសថៃដែលជាច្រក ព្រំដែនក្នុងការនាំទំនិញចេញចូលដ៏សំខាន់មួយសម្រាប់កម្ពុជា-ថៃ។ម្យ៉ាងវិញទៀតខេត្តនេះជាតំបន់ ដែលមានសក្តានុពល ខ្លាំងទាំងលើវិស័យទេសចរណ៍និងការអភិវឌ្ឍទៅជាតំបន់ឧស្សាហកម្ម ហើយក៏ជា​ខេត្ត​​មួយដែរសម្បូរ​ទៅដោយ​តំបន់​ទេសចរណ៍​ធម្មជាតិ ។

មានគម្រោងធំៗចំនួន៥ដែរបានចាប់ផ្ដើមសាងសង់ចាប់ពីឆ្នាំ២០១៩ កន្លងនេះនឹងគម្រោងខ្លះកំពុងតែជិត បញ្ចប់ក្នុងឆ្នាំ២០២០នេះតែម្តង ដែរកំពុងតែធ្វើឱ្យខេត្តមួយនេះកាន់តែបង្កើនភាពទាក់ទាញកាន់តែខ្លាំងឡើងបន្ថែមទៀតផង។ គម្រោងទាំង៥ នោះមានដូចជា៖

១- ការពង្រីក​ផ្លូវជាតិ​លេខ៤៨ចេញពី​ផ្លូវជាតិ​លេខ៤​​ទៅកាន់​ទីរួមខេត្ត​កោះកុងដែល​នឹង​ធ្វើឲ្យ​ខេត្ត​ដាច់ស្រយាល​មួយ​នេះកាន់តែ​​ទទួលបានភាពទាក់ទាញ និង​ការ​អ​ភិ​វ​ឌ្ឍ​បន្ថែម​ទៀត​នា​ពេល​អនាគត។ ការពង្រីក​ផ្លូវជាតិ​លេខ៤៨នេះ​ ​ត្រូវ​បាន​ប្រកាសដោយ​សម្តេច​តេជោ ​ហ៊ុន​ ​សែន ​នាយក​រដ្ឋមន្រ្តី​នៃ​ព្រះរាជាណាចក្រ​កម្ពុជា​កំឡុង​ពេល​សម្តេចអញ្ជើញ​ចូលរួម​ពិធីបុណ្យ​សមុទ្រ​កាលពី​ចុងឆ្នាំ​មុន​។

២- គម្រោងសាងសង់ព្រលានយន្តហោះអន្តរជាតិ​ទី៤របស់កម្ពុជាដែលមានតម្លៃ៣៥០លានដុល្លារសាងសង់លើ​ទំហំ​ដីរហូតដល់៧៥០ហិកតាដោយមានការ​វិនិយោគពី​ក្រុមហ៊ុន Union Development Group ​Co., Ltd. ។

៣- ការសាងសង់​ផ្លូវ​តភ្ជាប់​រវាង​ស្រុក​សំឡូត​ក្នុង​ខេត្ត​បាត់ដំបង​​ឆ្លងកាត់​ខេត្ត​ពោធិ៍​សាត់​ទៅកាន់​ខេត្តកោះកុង។ គម្រោង​ផ្លូវ​នេះ​នឹង​ចាប់ផ្តើម​នៅ​ឆ្នាំ២០១៩នេះ​ហើយដែលមាន​ប្រវែង ​ជាង ១៩០គីឡូម៉ែត្រ​។

៤- កំពង់ផែទឹកជ្រៅ​​នៅក្នុង​ខេត្តកោះកុងត្រូវបាន​សាងសង់ឡើងរហូតមកដល់​ពេលនេះ​គឺសម្រេច​បាន៩០ភាគរយហើយ​ ដែល​ធ្វើ​ឲ្យ​សកម្មភាព​ពាណិជ្ជកម្ម​ និង​ការ​អភិវឌ្ឍ​នៅ​ខេត្ត​នេះ​កាន់តែ​មាន​ភាព​សកម្ម​ និង​រីកការចម្រើន​។ ក្រៅពី​នេះ​ ខេត្តកោះកុង​ក៏​មាន​កំពង់ផែ​របស់​ក្រុមហ៊ុន​លីយ៉ុង​ផាត់​ (LYP​ Group​) ក៏បាន​នឹង​កំពុង​សាងសង់​នៅ​ក្បែរ​នោះ​ដែរ​ដែល​មាន​ជម្រៅ១២​ ម៉ែត្រ​បន្ថែម​ទៀត​ ដែល​ធ្វើ​ឱ្យ​ខេត្ត​មួយ​នេះ​កាន់តែ​មាន​សក្តា​នុ​ពល​កាន់តែ​ខ្ពស់​ក្នុង​ការ​នាំ​ទំនិញ​ទៅកាន់​ទីផ្សារ​បរទេស​។

៥- តំបន់ស្ថិតនៅជាប់ព្រំដែនប្រទេសថៃមានច្រកអន្តរជាតិដែលតភ្ជាប់ប្រទេសទាំងពីរឲមានភាពងាយស្រួលក្នុង ការដឹកជញ្ជូន ទំនិញ ទៅវិញទៅមកនឹងការតភ្ជាប់ពាណិជ្ជកម្ម។

គួរបញ្ជាក់ផងដែរថា បច្ចុប្បន្ននេះមានក្រុមហ៊ុនចិនគ្រោងនឹងអភិវឌ្ឍន៍នៅតំបន់តារាសាគរ ដែលស្ថិតនៅលើផ្ទៃសរុប ២០០ ហិចតាឲក្លាយទៅ ជាតំបន់វប្បធម៌ ទេសចរណ៍ដែរប្រកបទៅដោយភាពច្នៃប្រឌិតថ្មីនៃការរុករក ការកែលំអ នឹងការកែសម្រួលគំរូនៃការអភិវឌ្ឍរបស់ប្រទេសចិន។ គម្រោងធំៗទាំង៥នេះ នឹងធ្វើឱ្យសេដ្ឋកិច្ចនៅក្នុងខេត្តកោះកុងមានរីកលូតលាស់យ៉ាងខ្លាំងមិនចាញ់ខេត្តផ្សេងៗឡើយ។ ជាមួយ នឹងគម្រោង ធំៗទាំង៥ នេះតម្លៃដីក្នុងខេត្តកោះកុងនឹងមានកើនឡើងលើសពីការរំពឹងទុក ហើយក៏ជាឱកាសល្អខ្លាំង បំផុតសម្រាប់អ្នកវិនិយោគ លើវិស័យ អចនទ្រព្យនិងលើវិស័យផ្សេងៗ ទាំងអ្នកវិនិយោគក្នុងស្រុកនិងអ្នកវិនិយោគក្រៅស្រុកផងដែរ។

អត្ថបទ៖ ដារ៉ូ