​គម្រោងធំៗ៣ ដែលរដ្ឋសិក្សារួចតែមិនទាន់សម្រេចសាងសង់គឺដោយសារ បញ្ហាមួយនេះ

ភ្នំពេញ ៖​ យោងតាមប្រសាសន៍របស់ឯកឧត្ត ស៊ុន ចាន់ថុលទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថាគម្រោងធំៗចំនួន៣ដែល រដ្ឋាភិបាលបានប្រកាសថា សិក្សារួចរាល់ តែមិនទាន់អាចសាងសង់បានទេ ព្រោះគម្រោងនីមួយៗមានតម្លៃថ្លៃពេក មិនទាន់មានថវិកាគ្រប់គ្រាន់ឡើយ។

នាព្រឹកថ្ងៃទី ២១ ខែកុម្ភៈ ឆ្នាំ ២០២០ នេះ ​ក្នុងសន្និសីទសារព័ត៌មាន ស្ដីពី វឌ្ឍនភាព និងទិសដៅការងារបន្តរបស់ក្រសួងសាធារណការ និងដឹកជញ្ជូន នៅទីស្ដីការគណៈរដ្ឋមន្ត្រី ឯកឧត្តមស៊ុនចាន់ថុល បានលើកឡើងថា“យើងសិក្សាចប់គម្រោងទាំងបីនេះហើយ តែយើងមិនទាន់មានថវិកា​សាងសង់នៅឡើយទេ ព្រោះវាអាចចំណាយ ក្នុងចន្លោះ១០០០ ទៅ ១៤០០ លានដុល្លារអាមេរិក”។លោកបានបន្ថែមទៀតថា “យើងអោយក្រុមហ៊ុនឯកជនវិនិយោគ ឬយ៉ាងណានោះ រងចាំមើលសិន”។សម្រាប់គម្រោងទាំងបីដែលលោក លើកឡើងនោះរួមមាន Monorail Way គម្រោងផ្លូវរថភ្លើងរត់លើអាកាស AGT និងផ្លូវរថភ្លើងរត់ក្រោមដី។

ដោយឡែក ចំពោះផ្លូវល្បឿនលឿន ទាំងពីរខ្សែ លោកបានលើកឡើងថា រាជរដ្ឋាភិបាលបាននឹងកំពុងសាងសង់ផ្លូវល្បឿនលឿនពីភ្នំពេញទៅខេត្តព្រះសីហនុ និងកំពុងសិក្សាលើការសាងសង់ផ្លូវល្បឿនលឿនពីភ្នំពេញទៅបាវិត ដែលជាផ្លូវហាយវេអាស៊ានដ៏មានសក្ដានុពល ព្រមទាំងបន្តការសាងសង់ស្ពានឆ្លងទន្លេបន្ថែមទៀត តួយ៉ាងស្ពានស្ទឹងត្រង់ និងស្ពាននៅខេត្តក្រចេះជាដើម។

គួរជម្រាបផងដែរថា គម្រោងទាំងបីខាងលើដែលរដ្ឋាភិបាលធ្លាប់ធ្វើការសិក្សានេះ ពិតជាដើរតួសំខាន់ណាស់ក្នុងវិស័យដឹកជញ្ជូន និងសម្រួលដល់ចរាចរណ៍ក្នុងក្រុង តែសម្រាប់តម្លៃនៃគម្រោងនីមួយៗពិតជាថ្លៃណាស់។ប៉ុន្តែយើងនៅតែសង្ឃឹមថានឹង មានការវិនិយោគពី វិនិយោគិននៅក្រៅប្រទេស តាមរយៈការស្វះស្វែងរបស់រដ្ឋាភិបាលនេះ។

អត្ថបទ៖ ភោគ​ ម៉ារី