ព្រលានយន្តហោះ និងផ្លូវ១៧ ខ្សែនៅសៀមរាបហាក់ធ្វើឲ្យអចលនទ្រព្យនៅតំបន់នោះ កាន់តែមានឥទ្ធិពល

ភ្នំពេញ ៖ ក្រោយគម្រោងសាងសង់ព្រលានយន្តហោះថ្មីនិង ការស្ថាបនាសាងសង់បន្ថែមលើផ្លូវចំនួន១៧ខ្សែរួចមក ទឹកដីសៀមរាបហាក់អំណោយផលខ្លាំងលើវិស័យអចលនទ្រព្យ ពិសេសតំបន់មួយចំនួនដែលស្ថិតនៅជិតគម្រោងព្រលានយន្តហោះថ្មីនេះ។

​គម្រោងសាងសង់ព្រលានយន្តហោះតម្លៃ​វិនិយោគ​ប្រមាណ ៩០០លាន​ដុល្លារអាមេរិកដែល កំពុងពន្លឿនដំណើរការសាងសង់យ៉ាងមមាញឹកកំពុងលើកស្ទួយអចលនទ្រព្យក្នុងតំបន់អង្គរយ៉ាងល្អប្រសើរ។

ជាក់ស្ដែងកាលពីព្រឹកថ្ងៃទី១១ ខែកុម្ភៈ ឆ្នាំ២០២០នេះ លោកស្រី យូ សុភា អភិបាលរងខេត្តសៀមរាប ក៏បានមានប្រសាសន៍ក្នុងពិធីប្រកាសដាក់ឲ្យដំណើរការជាផ្លូវការនៅរចនាសម្ព័ន្ធថ្មីនៃរដ្ឋបាលស្រុកសូទ្រនិគមដែរថា ទីតាំងនៃអាកាស យានដ្ឋានអន្តរជាតិថ្មី ដែលនឹងដំណើរការនៅពេលឆាប់ៗខាងមុខនេះនឹងធ្វើឱ្យស្រុកមួយ ក្នុងចំណោមស្រុកទាំង១១ មានសំណាងជាងគេនោះគឺស្រុកសូទ្រនិគម។

ហើយកន្លលមកអាជ្ញាធរដែនដី លោក លី សំរិទ្ធ អភិបាលរងខេត្ត ក៏បានជួបជាមួយ ឯកឧត្តម ចាង គូរហ័រ (Zhang Huohua) អភិបាលរងខេត្តយូណាន នៃសាធារណៈរដ្ឋ ប្រជាមានិតចិន ពិភាក្សាអំពីគម្រោងសាងសង់អាកាសយានដ្ឋានអន្តរជាតិសៀមរាបអង្គរ ការពង្រឹង និងពង្រីកចំណងសម្ព័ន្ធមេត្រីភាព និងកិច្ចសហប្រតិបត្តិការរវាងខេត្តទាំងពីរផងដែរ ពិសេសពាក់ព័ន្ធទៅនឹងគម្រោងព្រលានយន្តហោះនេះតែម្ដង។

ហើយភាគិចិនក៏បាន ស្នើដល់រដ្ឋបាលខេត្តសៀមរាប ដូចជាការសម្របសម្រួលអោយមានការផ្គត់ផ្គង់ទឹក ភ្លើង បណ្តាញលូបង្ហូរទឹកខ្វក់ និងប្រពន្ធទូរគមនាគមន៍ ដើម្បីធ្វើយ៉ាងណាឱ្យដំណើរការ នៃការសាងសង់អាកាសយានដ្ឋាននេះប្រព្រឹត្តទៅដោយរលូន។

មួយវិញទៀតគម្រោងសាងសង់និស្ថាបនាផ្លូវទាំង១៧ខ្សែក្នុងទឹកដីសៀមរាបក៏បានរួមចំណែកយ៉ាងធំធេងក្នុងការលើកស្ទួយវិស័យនានាទាំង ទេសចរណ៍ ក៏ដូចជាការស្រូបទាញវិនិយោគិននានាងាកមកចាប់អារម្មណ៍លើគម្រោងវិនិយោគធំ នៅលើទឹកដីនេះផងដែរ។

ក្រៅពីគម្រោងធំៗទាំងពីរខាងលើ ជប៉ុននិងកម្ពុជាក៏កំពុងតែមានការ ពន្លឿនលើការអភិវឌ្ឍគម្រោងទីក្រុងឆ្លាតវៃដធំមួយទៀតផងដែរ។ ​គម្រោង​នេះមានការ​អភិវឌ្ឍជា​ទីក្រុង​ប្រកបដោយ​និរន្តរភាព​ដោយ​ភ្ជាប់​ជាមួយនឹង​បច្ចេកវិទ្យា​ ​ICT​ ​គឺ​សំដៅ​ដល់​ការ​ផ្ដល់​លទ្ធភាព​ប្រើប្រាស់​ព័ត៌មាន​ដោយ​ប្រើ​មធ្យោបាយ​ទូរគមនាគមន៍​ ​ដើម្បី​ដោះស្រាយ​បញ្ហា​មួយចំនួន​ដូចជា​ ​លំនៅ​ដ្ឋាន​ប្រជាជន​ ​ការ​កកស្ទះ​ចរាចរណ៍​ ​និង​បរិស្ថាន​ជាដើម។

គម្រោងធំៗក្នុងខេត្តសៀមរាបទាំងរបស់រដ្ឋនិងឯកជន ដែលមានវត្តមានលើទឹកដីអង្គរនេះ នឹងជួយកែប្រែក៏ដូចជាលើកស្ទួយ មុខមាត់ខេត្តនេះឱ្យកាន់តែប្រសើរឡើងថែមទៀតជាក់ជាមិនខាន់ ជាពិសេសលើផ្នែក អចលនទ្រព្យនិងវិស័យទេសចរណ៍តែម្ដង ។

​អត្ថបទ៖ ភោគ ម៉ារី