សម្តេច ស ខេង ៖ ហាមប្រជាជនខ្មែរ មិនឱ្យជួលដីស្រែនៅតាមបន្ទាត់ព្រំដែនឱ្យទៅប្រទេសជិតខាងទេ

ភ្នំពេញ ៖ សម្ដេច ស ខេង បានមានប្រសាសន៍ថា ការជួលដីឱ្យពលរដ្ឋប្រទេសជិតខាងនេះ វាមិនបានផ្ដល់ផលចំណេញអ្វីនោះទេ ប៉ុន្តែវាក៏អាចបង្កទៅជាជម្លោះទៅវិញនៅថ្ងៃខាងមុខ ក៏ថាបានដែរ។

កាលពីថ្ងៃទី១២ ខែមីនា ឆ្នាំ២០២០ កន្លងទៅនេះ សម្ដេចក្រឡាហោម ស ខេង មានប្រសាសន៍បែបនេះ ក្នុង​ឱកាសអញ្ជើញជាអធិបតីពិធីបិទសន្និបាតបូកសរុប លទ្ធផល​ការងារប្រចាំឆ្នាំ២០១៩ និងលើកទិសដៅ​ការងារឆ្នាំ២០២០ របស់រដ្ឋបាលខេត្តព្រៃវែង និងក្រុមការងាររាជរដ្ឋាភិបាលចុះ​មូលដ្ឋាន ។សម្ដេចក្រឡា​ហោមមាន​ប្រសាសន៍ថា ៖«គេសុំជួលដី ដើម្បីបង្កបង្កើនផលនៅតាមព្រំដែន អាហ្នឹងកុំឱ្យមានអោយសោះ ព្រោះយើងនៅសល់ដីប៉ុណ្ណឹងទេ ហើយរឿងយើងទៅដណ្ដើមដីគេ យើងអត់ដែលមានទេ ក្នុងប្រវត្តិសាស្រ្តខ្មែរ គឺមានតែគេមកដណ្ដើមដីយើង»។ ហើយវានឹងនាំឱ្យមានការស្មុគស្មាញទៅថ្ងៃខាងមុខ ហើយប្រជាជនណា ដែលជួលដីស្រែឱ្យទៅប្រទេសជិតខាង គឺខុសច្បាប់ កាធ្វើបែបនេះ ក្នុងន័យដើម្បីការពារបូរណភាព អធិបតេយ្យទឹកដីរបស់យើង។

​ គួរបញ្ជក់ផងដែរថា៖ កាលពីខែវិច្ឆិកា ឆ្នាំ២០១៥ រាជរដ្ឋាភិបាលកម្ពុជា ក៏បានចេញសារាចរមួយ ដើម្បីហាមប្រជាពលរដ្ឋខ្មែរ កុំឱ្យលក់​ឬជួល ដីស្រែ ដីចំការ ឬដីលំនៅដ្ឋាននៅតាមតំបន់​ព្រំដែនឱ្យទៅ​ប្រជាពលរដ្ឋនៃប្រទេសជិតខាង ដូចជា ប្រទេសវៀតណាម ឡាវ និងថៃ ជាដើម។ នៅក្នុងសារាចរនោះក៏បានបញ្ជាក់ថា ក្នុងករណី​មានការជួលហើយ តែពុំមានឯកសារគតិយុត្ត ឬកិច្ចសន្យាត្រឹមត្រូវ អភិបាលខេត្តត្រូវបញ្ឈប់លែងឱ្យមានការជួលតទៅទៀត។ ប៉ុន្តែក្នុងករណីជួលរួចហើយ មានឯកសារគតិយុត្តត្រឹមត្រូវការ​ជួលដីនោះអាចបន្តរហូតដល់អស់សុពលភាព ហើយបន្ទាប់​ពីអស់សុពលភាព ហាមមិនឱ្យជួលដីនោះបន្តឱ្យ ប្រជាពលរដ្ឋ ប្រទេសជិតខាងទៀតឡើយ៕

ប្រភព ៖ Business Cambodia