អ្នកជំនាញ និយាយពីតំបន់ដែលគួរវិនិយោគ អាចទទួលបានចំណេញនៅក្នុងឆ្នាំ២០២០

ភ្នំពេញ ៖ ចាប់តាំងពីដើមឆ្នាំ២០២០ ទីផ្សារអចលនទ្រព្យនៅកម្ពុជា បានជួបនឹងឱនភាពដោយសារតែបញ្ហាប្រឈមវិបត្តិជំងឺសាកល។ ប៉ុន្តែសម្រាប់ចរន្តនៃការទិញលក់ក្នុងស្រុកនៅតែមានសកម្មភាព ខណៈដែលអ្នកមានធនធានមួយចំនួនបានចាត់ទុកថា ព្រឹត្តិការណ៍សង្គមមួយនេះ គឺជាឱកាសរបស់ខ្លួនក្នុងការវិនិយោគដើម្បីទទួលបានចំណេញក្រោយពេលភាពប្រឈមមួយនេះត្រូវបានផុតរលត់ទាំងស្រុង។

នាយិកាក្រុមហ៊ុនអចលនទ្រព្យ AMATAK Property Service លោកស្រី តាំង ហួរ បានមានប្រសាសន៍កាលពីពេលថ្មីៗនេះថា នៅក្នុងដំណាក់កាលនេះគម្រោងអចលនទ្រព្យធំៗកំពុងតែរងសម្ពាធ ដោយសារតែអ្នកវិនិយោគ និងអភិវឌ្ឍន៍ភាគច្រើនជាជនជាតិបរទេស ដែលកំពុងតែស្ថិតក្នុងប្រទេសប្រឈមខ្ពស់នឹងវិបត្តិជំងឺឆ្លង ប៉ុន្តែសម្រាប់គម្រោងតូចៗ ជាពិសេសទីផ្សារដីធ្លីដែលមានទំហំតូច និងមធ្យមនៅតាមតំបន់ជាយក្រុង និងតាមខេត្តមួយចំនួននៅតែមានសកម្មភាព។

លោកស្រី តាំង ហួរ បានមានប្រសាសន៍បន្តទៀតថា “នៅក្នុងស្ថានភាពនេះ បើទោះជាតម្លៃទីផ្សារអចលនទ្រព្យ ក៏ដូចជាវិស័យដីធ្លីមិនមានការឡើងថ្លៃ ប៉ុន្តែវាក៏មិនធ្លាក់ចុះនោះដែរ ហើយសម្រាប់អ្នកដែលមានធនធាន និងលំហូរសាច់ប្រាក់គ្រប់គ្រាន់ អាចមានឱកាសច្រើនក្នុងការទិញទុក និងលក់បន្តយកចំណេញក្រោពេលវិបត្តិនៃជំងឺសាកលមួយនេះត្រូវបានផុតរលត់ ជាពិសេសនៅតាមតំបន់សំខាន់ៗដែលស្ថិតនៅជាយរាជធានីភ្នំពេញ និងតាមបណ្តាខេត្តដូចដែលបានលើកឡើងខាងលើ”។

អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិ Century21 Advance Property លោក ឡុង គឹមសួគ៌ បានមានប្រសាសន៍ថា មិនថាតំបន់ជាយក្រុង ឬនៅតាមបណ្តាខេត្តនោះទេ អត្រានៃការទទួលបានចំណេញគឺសុទ្ធតែមានឱកាសដូចគ្នា។

លោកបានបញ្ជាក់ថា “តម្លៃអចលនទ្រព្យ ឡើងនៅពេលមានការគម្រោងអភិវឌ្ឍន៍ ដូច្នេះ មិនថាស្ថិតនៅក្នុងក្រុង ជាយក្រុង ឬនៅតាមបណ្តាខេត្តណាមួយនោះទេ សំខាន់ឱ្យតែស្ថិតនៅក្នុងតំបន់ដែលមានគម្រោងអភិវឌ្ឍន៍ពិតប្រាកដ អត្រាឡើងថ្លៃគឺមានខ្ពស់”។

ប្រភព ៖ Property area